Video: Baada ya kutupiwa ndizi uwanjani, Dani Alves arejesha mapigo kwa wabaguzi wa rangi Hispania Baada ya kuchukua Ndizi na Kuibugia

Beki wa pembeni kutoka nchini Brazil na klabu ya Barcelona, Dani Alves ameushangaza ulimwengu wa soka, kufuatia shukrani alizozitoa dhidi ya mashabiki wa klabu ya Villareal waliomtupia ndizi akiwa uwanjani usiku wa kumkia hii leo huko El Madriga.

Katika hali isiyotarajiwa Daniel Alvesa alifanya hivyo mara baada ya mchezo kati ya Barcelona na Villareal kumalizika huku Barca wakipata ushindi wa mabao matatu kwa mawili.

Alves, amesema kurushiwa ndizi akiwa uwanjani kwake anakichukulia kitendo hicho ni cha kawaida na anaamini wanaofanya hivyo ni mashabiki wenye upeo mdogo wa kufikiria ambao bado wanahitaji usaidizi wa kubadilishwa kimawazo.

Amesema ameishi nchini Hispania kwa miaka 11 na mara kadhaa wachezaji wenye asili ya bara la Afrika wamekua wakikutana na vitimbi kama hivyo, ambavyo vinaashiria ubaguzi wa rangi hali ambayo amesisitiza ameshaizoea.

 

 

Hata hivyo beki huyo mwenye umri wa miaka 30, kwa kuonyesha hajali masuala ya ubaguzi wa rangi, alidiriki kukata kipande cha ndizi aliyorushiwa uwanjani na kukila huku sehemu iliyo baki akiitupa pembezoni mwa uwanja wakati akijitayarisha kupiga mpira wa kona. "Sikufahamu ni nani alitupa ndizi ile, lakini sijali kutokana na kuichukulia tabia hiyo kama ya kawaida ambayo siku zote imekua ikifanywa na mashabiki wenye upeo mdogo wa kimawazo.” Amesema Alves. "Ni Ajabu kwa mtu ambae anapenda soka kuendeleza vitendo vya ubaguzi wa rangi ambavyo kila siku vinapigwa vita duniani kote, hivyo sikujali ndio maana nilidiriki kukata sehemu ya ndizi na kuila kwa kuwaonyesha wahusika waliofanya kitendo kile ndizi ni sehemu ya matunda niyapendayo” Ameongeza Alves. Mashabiki wa soka nchini Hispania wamekua na tabia ya kurusha ndizi uwanjani kwa kuwalenga wachezaji wenye asili ya bara la Afrika ambao siku zote wamekua wakifananishwa na nyani.