Rais wa zamani wa Madagaska Marc Ravalomanana amekubali kurudi nchini kwake.

 

Rais Jakaya Mrisho Kikwete na Rais wa zamani wa Madagascar Marc Ravalomanana wakati wa mkutano na waandishi wa habari Ikulu jijini Dar es salaam leo December 11, 2012.

Na Veronica Kazimoto – MAELEZO

Rais wa Jamuhuri ya Muungano wa Tanzania Dkt. Jakaya Kikwete amefanikiwa kufanya mazungumzo na Rais wa zamani wa Madagaska Marc Ravalomanana ambaye amekubali kurudi nchini kwake baada ya kuwa uhamishoni  nchini  Afrika Kusini tangu mwaka 2009.

Akizungumza na wahariri wa vyombo vya habari Ikulu jijini Dar es Salaam leo,  Rais Kikwete amesema Ravalomanana amekubali pia kutokugombea katika uchanguzi utakaofanyika nchini humo mwezi Mei 2013 ili kuleta amani na utulivu.

“Nimezungumza na Rais Ravalomanana na amekubali kurudi nchini kwake madagaska  na kukubali kutokukugombea  uchaguzi ujao kama maamuzi ya  Jumuiya ya Maendeleo ya Nchi za Kusini mwa Afrika (SADC) yalivyofikiwa katika vikao vyake vya hivi karibuni”, amesisitiza Rais Kikwete.

Raisi kikwete amefafanua  kuwa Ravalomanana  anarudi nchini Madagaska bila masharti yoyote na atapewa ulinzi na Serikali ya nchi hiyo ikisaidiana na Jumuiya ya SADC.

Kwa upande wake Rais Ravalomanana amemshukuru Rais kikwete kwa kufanikisha mazungumzo hayo  na  amesema anaheshimu maamuzi yaliyotolewa na SADC kwa lengo la kuisaidia Madagaska kuwa katika hali ya amani.

“Ninamshukuru Rais Kikwete kwa kufanikisha mazungumzo haya na niko tayari kurudi nchini kwangu kujenga, kuimarisha na kushirikiana na wananachi  ili kuleta amani na utulivu,” amesema  Ravalomanana.

Rais kikwete alipewa jukumu na Jumuiya ya Maendeleo ya Nchi za Kusini mwa Afrika  la kufanya mazungumzo na Marais wote wa wawili,  Rais wa sasa wa Madagaska Andry Rajoelina na Rais wa zamani Marc Ravalomanana ambapo mazungumzo bado yanaendelea kwa upande wa Rais Rajoelina.