KORTI YAMWAMURU MJUKUU WA MANDELA KUREJESHA MIILI NDANI YA MASAA MAWILI

Mandla Mandela.

 Mjukuu wa kiume wa Mzee Nelson Mandela amepewa masaa mawili (yaliyoishia leo saa 9 alasili) awe amefukua mabaki ya miili mitatu ya ndugu zake na kuyarejesha kwenye kiwanja cha maziko cha familia hiyo au atahukumiwa kifungo jela baada ya kuwa ametuhumiwa kuhamisha makaburi kinyume cha sheria.

Mandla Mandela alipewa chini ya masaa 24 na mahakama mjini Mthatha kurejesha miili ya watoto watatu wa rais huyo wa zamani wa Afrika Kusini kwenye kijiji cha Qunu, ambako Mandela alikulia.

Ndugu 16 wamempeleka Mandla mahakamani baada ya kuzika upya mabaki ya miili ya watoto wa baba huyo wa taifa mwenye miaka 94 kwenye eneo alilozaliwa la Mvezo mwaka 2011.

Ndugu wa Mandela wanadai Mandla Mandela hakupata ruhusa au hata kuwataarifu wanafamilia wakati alipochukua uamuzi huo.

Baba huyo wa taifa alishasema tangu awali kwamba anataka kuzikwa huko Qunu, ambako watoto wake walizikwa kwenye makaburi ya familia, na mahali ambako aliishi baada ya kustaafu kama rais.

Kwa mujibu wa vilivyomo kwenye wosia wake ambao umechapishwa, angependa kuzikwa kwenye kaburi la gharama nafuu katika bustani ya kumbukumbu nyumbani kwake - mahali ambako hapo awali alisema panabeba kumbukumbu za maisha yake ya utotoni.

Wiki iliyopita mahakama hiyo ilitoa amri ya mpito kwa miili hiyo kuhamishwa takribani kilomita 14 kutoka Mvezo kwenda Qunu.

Lakini Mandla, ambaye ni chifu wa Mvezo, sasa anapinga amri hiyo.

Inaaminika kwamba Mandla alihamisha miili ya binti mkubwa wa Mandela, Thembi, ambaye alifariki kwa ajali ya gari mwaka 1969, Magkatho, ambaye alifariki kwa ukimwi mwaka 2005 na Makaziwe, ambaye alifariki kwa homa ya uti wa mgongo akiwa na umri wa miezi minane tu mwaka 1948, katika jaribio la kujipatia fedha wakati babu yake atakapofariki.

Aliripotiwa kwamba kuhamisha miili hili ni sehemu ya hila zake kuhakikisha Mandela anazikwa ndani ya kituo cha wageni alichojenga kilichomgharimu Pauni za Uingereza milioni 4.